«Падорым лета дзецям палітвязняў». Засталося сабраць 1180 еўра
Працягваецца збор грошай на летні адпачынак дзецям палітвязняў. Засталося сабраць зусім крыху.
01.06.2023 / 16:06
Кожнае дзіця атрымлівае падарункі на суму, эквівалентную 100 еўра.
«У Беларусі ўсё яшчэ ёсць вялізная колькасць палітычных зняволеных і былых палітвязняў, у многіх з якіх ёсць дзеці. Ці варта казаць, што сродкаў, якія можа здабыць адзін з бацькоў, а часам і толькі бабулі ці дзядулі, ледзь хапае на пакрыццё побытавых выдаткаў.
Мы хочам падарыць дзецям, якія і так перажываюць вялізны стрэс ад расстання з бацькамі, моманты радасці.
Сабраныя сродкі пойдуць на дапамогу ў арганізацыі летняга адпачынку для дзяцей палітвязняў і людзей, якія вызваліліся з турмы:
- Экскурсіі, вандроўкі, падарожжы, дзіцячыя летнікі;
- Адукацыйныя гурткі па шахматах, маляванні і інш.;
- Спартыўныя секцыі: басейн, тэніс, футбол;
- Рыштунак для гульняў: мячы, красоўкі, гульні, самакат, ровар, ролікі, пэндзлі, ватман.
На кожнае дзіця будзе выдзелена сума 100 еўра», — паведамляе фонд «Байсол».
Па стане на 16:00 1 чэрвеня сабрана 25 320 еўра з неабходнай сумы 26 500 еўра. 186 дзяцей з 265 ужо атрымалі выплаты, паведаміў Андрэй Стрыжак.
У канцы 2022 года «Байсол» абвяшчаў збор на калядна-навагоднія падарункі дзецям палітвязняў, і праект быў паспяхова выкананы.