Свабоду ступням! Якія перавагі і небяспекі тоіць «басаногі абутак»
Трэнд на абутак barefoot, які паспеў укараніцца на Захадзе, нарэшце прыйшоў у Беларусь. Якія плюсы і мінусы хаваюць модныя чаравікі — раскажам у гэтым матэрыяле.
13.01.2024 / 09:00
У 1935 годзе група італьянскіх альпіністаў-аматараў пад кіраўніцтвам Вітале Брамані распачала адчайную спробу ўзысці на пік Расіка ў інавацыйнай амуніцыі — лёгкіх ботах. Абутак з падэшвай з тоўстага фетру выдатна ўтрымліваў ступню, не даючы ёй слізгаць. Аднак эксперымент аказаўся правальным: цеплаправоднасць ботаў была не на вышыні, і адразу шасцёра чальцоў атрада абмарозілі ногі, не змаглі спусціцца і ў выніку загінулі.
Сам Брамані выжыў. Справіўшыся з шокам, ён паставіў перад сабой амбіцыйную мэту — вынайсці чаравікі, якія дапамогуць спартсменам пазбягаць траўмаў і будуць паляпшаць іх вынікі. Так была заснавана кампанія Vibram, якая праз 60 гадоў выпусціць адну з першых пар «басаногага абутку».
Як дзіўны абутак увайшоў у моду
У канцы дзевяностых новы дызайнер брэнда Роберт Фліры прыдумаў мадэль Vibram FiveFingers, або «пальчатак для ног». Абутак з адсекамі для пальцаў спадабаўся энтузіястам фітнесу: ёгі і бегуны з задавальненнем раскуплялі эксцэнтрычныя красоўкі.
Фота: Vibram
З марафонскіх дарожак трэнд прыйшоў на модныя подыумы. У 2020 годзе выйшла калабарацыя Balenciaga і Vibram: разам брэнды стварылі чаравікі-шкарпэткі, бацільёны на абцасе і красоўкі на шнуроўцы.
Фота: Vibram
Неўзабаве быў распрацаваны дроп з Suicoke. Вядомая японская марка стварыла паўбоцікі з пазногцямі, якія можна фарбаваць. Але аматары спорту любяць басаногі абутак не за яркі дызайн.
Фота: Vibram
У чым сэнс трэндавай мадэлі
Вядома, што ступні валодаюць значнай колькасцю нервовых канчаткаў, праз якія ў мозг перадаецца сэнсарная зваротная сувязь — звесткі пра навакольнае асяроддзе, якія ўплываюць на пачуццё раўнавагі і прасторавую арыентацыю. Грубы абутак ускладняе перадачу такой сувязі і затрымлівае імпульсы, якія патрэбны мозгу для аналізу.
Акрамя таго, сучасны абутак часта бывае вузкай і выцягнутай формы з жорсткім наском. У такім — вялікі палец і мезенец здушваюцца, што з часам прыводзіць да дэфармацыі ступні і праблем з суставамі.
Фота: unsplash.com
У адрозненне ад класічных мадэляў, басаногі абутак не абмяжоўвае пальцы, не мае супінатараў або амартызатараў, а таксама валодае выключна тонкай падэшвай — яе таўшчыня не павінна перавышаць 8 мм, а самыя «стромкія» брэнды наогул знізілі гэты паказчык да 4 мм. Barefoot павінен быць гнуткім і без намаганняў скручвацца ў трубачку па ўсіх плоскасцях.
Фота: Vibram
Лічыцца, што нашэнне такога абутку гарантуе разгрузку суставаў і спрыяе ўмацаванню цягліц, звязак і сухажылляў ступні. Зрэшты, не ўсё так адназначна.
Боты не для ўсіх
Артапеды да гэтага часу не сышліся ў меркаванні, чаго больш ад нашэння свабодных бот — шкоды або карысці. У любым выпадку, перайсці на такія мадэлі на практыцы аказваецца не проста.
Аматарам «басаногасці» трэба падрыхтавацца: боль і непрыемныя адчуванні ў пачатку носкі — частыя спадарожнікі такіх чаравікоў. Таму пачынаць іх выкарыстанне трэба з гадзіны ў дзень, паступова павялічваючы час. Бывалыя «басякі» кажуць, што, каб прывыкнуць да новага абутку, ступням спатрэбіцца ад пары месяцаў да некалькіх гадоў.
Фота: unsplash.com
У абутку з тонкай падэшвай частата крокаў становіцца большай, а сам крок — карацейшым. Змяняецца і механіка хады: калі ў звычайных чаравіках першай зямлі дакранаецца пятка, то ў barefoot апора прыходзіцца на сярэднюю або пярэднюю частку ступні. Дарэчы, маленькія дзеці бегаюць менавіта так — з наска на пятку. Мяркуецца, што гэта дапамагае зменшыць сілу сутыкнення з зямлёй і празмерны ціск на заднюю частку ступні.
Фота: Vibram
Але, нягледзячы на маркетынгавыя запэўненні, якія ва ўнісон расхвальваюць карысць такога абутку, існуе група людзей, якім трэндавыя боты ўвогуле проціпаказаныя. Пры падэшвеннай фасцыі, дыябетычнай ступні, балючых мазалях і натоптышах басаногі абутак можа пагоршыць стан. Таму планаваць пераход на «басаногасць» трэба пасля кансультацыі з лекарам.
Чытайце таксама:
Не будзь як Саладуха. Што не так з «ядзерным» адбельваннем зубоў
На сустрэчы з Лукашэнкам Наталля Качанава парушыла адразу тры правілы дзелавога дрэс-коду
Майка з «Тытанікам» і балоневыя касцюмы. Як беларусы апраналіся ў 90-я