Najlepšaja praca ŭ śviecie? Kampanija šukaje teściroŭščyka luksavych numaroŭ atelaŭ
Patrabavańni da kandydataŭ nie składanyja. Možna ŭziać z saboju siabra.
28.03.2024 / 13:40
Jak by chto nie lubiŭ svaju pracu, ale pieryjadyčna jaho naviedvajuć dumki ab tym, što jość i lepšyja miescy. Prapanova ad brytanskaj kampanii Velloy abiacaje, jak minimum, vydatnyja ŭmovy pracy.
«Vy toj, chto atrymlivaje asałodu ad ježy, padarožžaŭ i vydatnych rečaŭ u žyćci? U vas jość praha da padarožžaŭ, vytančany hust i ŭvažlivaść da detalaŭ? Kali tak, to ŭ nas jość prapanova dla vas», — paviedamlajecca ŭ abviestcy ab vakansii, raźmieščanym na sajcie kampanii.
U abaviazki «ekśpierta absłuhoŭvańnia numaroŭ kłasa luks» uvachodzić acenka efiektyŭnaści absłuhoŭvańnia numaroŭ, analiz raznastajnaści i jakaści stravaŭ, što prapanujucca, acenka zdolnaści słužby atela zadavolić raznastajnyja dyjetyčnyja zapatrabavańni klijentaŭ (najaŭnaść biezhlutenavych, viehietaryjanskich i viehanskich stravaŭ).
Ekśpiert pavinien budzie štomiesiac davać acenku jak minimum čatyroch atelaŭ. U svaich ahladach jamu nieabchodna budzie pradstaŭlać padrabiaznyja apisańni i fota kožnaj stravy, dzialicca na forumach i ŭ błohach kampanii paradami i rekamiendacyjami dla padarožnikaŭ.
Jakija ateli i kali naviedvać, budzie zaležać tolki ad samoha ekśpierta. Kandydaty pavinny mieć dziejsny zamiežny pašpart, vydatna vałodać anhlijskaj movaj, umieć rabić jakasnyja fotazdymki, mieć «prahu da padarožžaŭ, ježy i raskošnych uražańniaŭ», a taksama być starejšymi za 21 hod.
Kampanija abiacaje zarobak u 50 tysiač funtaŭ sterlinhaŭ u hod. Akramia pakryćcia vydatkaŭ na pražyvańnie, pracadaŭca harantuje apłatu i inšych vydatkaŭ. Siudy ŭvachodzić prajezd pieršym kłasam, ježa i napoi ŭ ateli, a taksama kišennyja hrošy na toje, kab vyvučyć miesca, u jakim znachodzicca atel.
Pry hetym ekśpiertu nie abaviazkova padarožničać samotna, možna ŭziać z saboju svajho partniora. Kampanija abiacaje pakryć usie jaho vydatki.
Kali vy ličycie, što heta praca dla vas, to paśpiašajciesia. Padać zajaŭku možna da 9 maja.
Čytajcie jašče:
«Heta jaje štodzionnaja praca». Ajcišnik płacić svajoj žoncy štomiesiačny zarobak
Babrujskaja vieterynarka pakazała, jak vyhladaje praca mary FOTAFAKT