Абельская пайшла ў сенатары, каб атрымаць недатыкальнасць? Распыталі яе інфармаваных калег
Суразмоўцы з мінскіх медыцынскіх колаў высунулі нетрывіяльныя версіі аб прычынах з'яўлення Ірыны Абельскай у складзе Савета Рэспублікі.
22.04.2024 / 16:53
Ірына Абельская
Ірына Абельская, вядомая як мама Колі Лукашэнкі, сёлета села ў бежавае крэсла сенатара — пасады без адказнасці, але са статусам і з просторай для наладжвання сувязяў і вырашэння пытанняў.
Навошта? Для чаго? У мінскіх медыцынскіх колах склаліся версіі на падставе ўласнага аналізу. Перадаем.
«Сітуацыя такая, што Абельская — фактычна паралельны міністр аховы здароўя. Калі нешта не атрымліваецца вырашыць з міністрам, ідуць да яе. І калі з ёй дамовіўся, ужо ніхто не ўказ. Я кажу пра камерцыйныя рэчы, якія часам прыцягваюць увагу органаў фінансавых расследаванняў.
І хаця яна цяпер і не ў зоне рызыкі, але ў гісторыі ўжо былі моманты апалы, калі крэатура Абельскай — экс-міністр Васіль Жарко і яго падзельнікі — ледзь не засадзілі ў турму і сябе, і яе.
Я так разумею — і увогуле, у медыцынскіх колах прынята так лічыць, — што яна арганізавала сабе месца ў Савеце Рэспублікі, каб атрымаць імунітэт ад крымінальнага пераследу. На выпадак калі ў кагосьці з жулікаў, якія таўкуцца вакол яе і дзякуючы ёй робяць справы, пры затрыманні развяжацца язык», — кажа адзін са знакамітых дзеячаў медыцынскай сферы, які зблізку назірае за дзейнасцю Абельскай.
Статус члена Савета Рэспублікі не дае абсалютнай гарантыі бяспекі, але ўскладняе працэдуру прыцягнення да адказнасці — затрымаць сенатара могуць толькі з папярэдняй згоды яго калег. Выключэнне — для падазраваных у здзяйсненні асабліва цяжкага злачынства.
Меркаванне іншага інфармаванага доктара пайшло ў іншы бок:
«Я думаю, што ў бліжэйшай будучыні Лукашэнка будзе выводзіць Абельскую на нейкую палітычна-адміністрацыйную пазіцыю.
Ён цяпер наверх цягне толькі самых лаяльных, а тут іх сам лёс разам звёў. Яна ж як маці разумее, што цяпер лёс яе сына залежыць ад лёсу бацькі. Які, можа, быць і не самы лепшы муж — дый не муж увогуле, — але так атрымалася.
Але пакуль Абельская да палітычнай ролі і сама не гатова, і народ яе ўсё ж ведае слаба, калі не ўлічваць аўдыторыю пратэсных СМІ і пацыентаў лечкамісіі. Думаю, задача — спрацаваць яе з Качанавай. Прымільгаецца на публіцы, натрэніруецца, а пад канец сенатарскай кадэнцыі ці недзе ў яе сярэдзіне можна даць ёй адказную пасаду», — сказаў іншы наш суразмоўца.
Дзед Колі Лукашэнкі быў палітвязнем — атрымаў 25 гадоў ГУЛАГа за дапамогу «бандэраўцам»
Стала вядома, хто тая загадкавая брунетка ў чырвонай сукенцы, якая суправаджала Абельскую ў Зімбабвэ
Якія рэчы мы знайшлі ў гардэробе Ірыны Абельскай