Pamierła Volha Žuraŭlova
Jana była ŭ nacyjanalnym ruchu z 2006 hoda. U 2020-m jana była vymušanaja pakinuć Biełaruś i akazałasia va ŭkrainskaj Bučy.
27.04.2024 / 15:29
Pamierła hramadskaja aktyvistka Volha Žuraŭlova, paviedamili ŭ sacsietkach jaje siabry. Padrabiaznaści śmierci nie nazyvajucca.
Volha pryjšła ŭ demakratyčny ruch u 2006 hodzie. Jana kazała, što pabačyła na ścianie kantakty «Zubra», pazvaniła i ŭsio zaviarciełasia. Potym byli «Małady front», «Alternatyva», AHP, «Havary praŭdu». Volha brała ŭdzieł u roznych akcyjach.
30 maja 2014 hoda jana vyjšła na Kastryčnickuju płošču Minska z płakatam «Śmierć kramloŭskim akupantam!» u znak pratestu suprać padpisańnia ŭ Astanie damovy ab stvareńni Jeŭrazijskaha ekanamičnaha sajuza. Jaje zatrymali, ale viečaram adpuścili: u jaje byŭ małaletni syn.
U 2020 hodzie Volhu zatrymali za dopisy ŭ sacsietkach, zapisali videa. Jana vymušana była pakinuć Biełaruś. Žyła ŭ Bučy pad Kijevam, jakaja potym stała simvałam rasijskich złačynstvaŭ va Ukrainie.
«Buča — heta byŭ svoj śviet (da vajny) ź ciopłymi, charošymi ludźmi», — zhadvała jana pra svajo žyćcio va Ukrainie.
Paśla pačatku vajny va Ukrainie jana pierabrałasia ŭ Polšču.
U červieni 2022 hoda Volha Žuraŭlova dała intervju Illi Dabratvoru.