Z-za palityčnaj situacyi pravieści paŭnavartasnaje ankietavańnie ŭ Biełarusi ciapier niemahčyma. Tamu daśledčyki arhanizavali interniet-intervju. Pa hetaj pryčynie vybarka była abmiežavanaja nie tolki haradskim nasielnictvam, ale i zvužana da karystalnikaŭ interneta.
Było apytana 683 respandenta va ŭzroście ad 18 da 35 hadoŭ.
Aŭtary dapuskajuć, što, niahledziačy na toje, što vybarka była ŭzvažanaja, kab dakładna adlustravać strukturu moładzi Biełarusi, jość imaviernaść, što padtrymka Łukašenki i jaho palityki moža być krychu vyšejšaj, čym adlustravana ŭ apytańni, bo prychilniki Łukašenki časta mienš sacyjalna i ekanamična aktyŭnyja, radziej karystajucca internetam, čym jaho praciŭniki.
Taksama aŭtary adznačajuć upłyŭ strachu respandentaŭ pry prachodžańni apytańnia, što taksama mahło paŭpłyvać na vyniki.
Spažyvańnie navin
U zaležnaści ad častaty spažyvańnia navin z roznych vidaŭ ŚMI daśledčyki vydzielili čatyry siehmienty maładych biełarusaŭ pa miedyjaspažyvańni.
Čatyry siehmienty maładych biełarusaŭ pa miedyjaspažyvańniu. Krynica: Chatham House
Kožny piaty z apytanych (19%) atrymlivaje naviny ź niedziaržaŭnych ŚMI. Trochi bolej za piatuju častku (22%) addaje pieravahu dziaržaŭnym. Kožny čaćviorty (26%) imkniecca prahladać abodva siehmienty miedyjaprastory.
Admietna, što kožny treci (32%) apytany nie cikavicca navinami, prahladaje prahramy i sajty navin radziej za raz na tydzień.
Daśledavańnie pakazała, što bolš pałovy moładzi (55%) nie sočyć za palityčnymi błohierami i žurnalistami, a siarod tych, chto heta robić, bolšaj papularnaściu karystajucca rasijskija kamientatary.
Acenka ekanamičnaj situacyi
Jak pakazała daśledavańnie, moładź Biełarusi čaściej ličyć spryjalnaj ekanamičnuju situacyju ŭ krainach ES i ZŠA, čym u Rasii i Biełarusi. Tak ekanamičnuju situacyju ŭ Hiermanii jak vielmi dobruju acaniła ŭ dva razy bolej respandentaŭ, čym dało takuju adznaku situacyi ŭ Biełarusi (adpaviedna 14% i 6%).
Pry hetym, na dumku 7% apytanych ekanamičnaja situacyja ŭ Biełarusi vielmi drennaja. I heta samy horšy pakazčyk u paraŭnańni ź inšymi krainami. Pra Rasiju tak ličać 5% apytanych, Polšču i ZŠA — 2%.
Acenka ekanamičnaj situacyi. Krynica: Chatham House
Kali ž rabić papraŭku na miedyjaspažyvańnie, to vidavočna, što aŭdytoryja niedziaržaŭnych ŚMI značna čaściej aceńvaje ekanamičnuju situacyju ŭ Biełarusi i Rasii jak niespryjalnuju. U toj ža čas 14% aŭdytoryi abodvuch typaŭ ŚMI ličyć ekanamičnuju situacyju ŭ Biełarusi vielmi dobraj, u toj čas, jak siarod aŭdytoryi dziaržaŭnych ŚMI tak ličać tolki 6%.
Acenka ekanamičnaj situacyi ŭ Biełarusi pa miedyjasiehmientam. Krynica: Chatham House
Daśledavańnie pakazała, što moładź schilnaja čaściej padzialać mierkavańnie ab nieabchodnaści ekanamičnych reformaŭ, čym ab ich niepatrebnaści. Adnak, kansensusu ab charaktary reformaŭ siarod maładych ludziej niama.
Pry hetym admietna, što nieaktyŭnaja aŭdytoryja (tyja ludzi, jakija redka karystajucca ŚMI) bolš vykazvajecca za poŭnaje ci značnaje refarmavańnie (46%), čym aŭdytoryja abodvuch typaŭ ŚMI (42%).
Znoŭ ža cikavym zjaŭlajecca toj fakt, što mienavita siarod prychilnikaŭ abodvuch typaŭ ŚMI najbolš tych (12%), chto ličyć, što reformy niepatrebnyja (niahledziačy na toje, što siarod ich tych, chto ličyć ekanamičnuju situacyju ŭ krainie chutčej drennaj i drennaj, 28%).
Acenka nieabchodnaści refarmavańnia ekanomiki pa miedyjasiehmientam. Krynica: Chatham House
Zamiežnapalityčnyja pieravahi
Siarod krain najbolš simpatyj u moładzi da Kitaja. Pra svaje vielmi dobryja i ŭ asnoŭnym dobryja adnosiny da hetaj krainy zajaviła 77% apytanych. Da Rasii takija adnosiny majuć 68%, Polščy — 64%, ES — 63%, Ukrainy — 61%, Litvy — 59% apytanych. Na apošnim miescy apynulisia ZŠA (54%).
Aŭtary daśledavańnia adznačajuć, što, niahledziačy na toje, što ŭ cełym biełaruskaja moładź dobra stavicca da susiednich krain i vialikich hieapalityčnych aktaraŭ, mierkavańni adroźnivajucca ŭ zaležnaści ad typu spažyvanych miedyja. Tak aŭdytoryja niedziaržaŭnych ŚMI lepš stavicca da Ukrainy, a aŭdytoryja dziaržaŭnych ŚMI čaściej za inšych niehatyŭna adnosicca da ZŠA i krain ES.
Vyniki apytańnia pakazali, što bolšaść moładzi abjadnoŭvaje žadańnie albo nie ŭstupać u mižnarodnyja sajuzy, albo być u sajuzie z Rasijaj i ES adnačasova.
Imavierna, ličać aŭtary daśledavańnia, heta prajava zamiežnapalityčnaha vybaru ŭ biełaruskim hramadstvie, a nie vynik nieadrefleksavanaści pytańnia. U vypadku ź nieadrefleksavanaściu pytańnia maładyja ludzi schilnyja davać prarasiejskija adkazy.
41% moładzi ličyć, što Biełaruś pavinna zastavacca siabram Arhanizacyi damovy ab kalektyŭnaj biaśpiecy; 47% vystupaje za niejtralitet i 12% za ŭstupleńnie krainy ŭ NATA.
U jakim hieapalityčnym sajuzie lepš znachodzicca Biełarusi? Krynica: Chatham House
Staŭleńnie da jadziernaj zbroi
Apytańnie pakazała, što biełaruskaja moładź nie padtrymlivaje raźmiaščeńnia ŭ krainie rasijskaj jadziernaj zbroi. Stanoŭča heta acaniŭ tolki kožny dziasiaty. Chutčej stanoŭča — kožny piaty. A voś admoŭna i chutčej admoŭna vykazalisia siem čałaviek ź dziesiaci.
Admietnym zjaŭlajecca toje, što siarod aŭdytoryi abodvuch typaŭ ŚMI stanoŭča da raźmiaščeńnia rasijskaj jadziernaj zbroi pastaviŭsia kožny piaty (19%), chutčej stanoŭča — kožny treci (33%). U toj ža čas siarod tych, chto hladzić tolki dziaržaŭnyja kanały, całkam stanoŭčaje staŭleńnie ŭ 15%, a chutčej stanoŭčaje ŭ 29%.
Staŭleńnie da raźmiaščeńnia rasijskaj jadziernaj zbroi na terytoryi Biełarusi. Krynica: Chatham House
Staŭleńnie da vajny
Apytańnie pakazała, što moładź Biełarusi nie schilnaja padtrymlivać dziejańni Rasii na terytoryi Ukrainy i nie choča bačyć vojski Biełarusi dałučanymi da vajny naŭprost. Maładyja ludzi schilnyja ličyć, što Biełaruś pavinna vykonvać niejtralitet u vajnie i nie padtrymlivać ni adzin z bakoŭ.
Bolšaść respandentaŭ choča spynieńnia vajny jak maha chutčej. Pry hetym 18% miarkuje, što vajna pavinna skončycca paśla dasiahnieńnia Rasijaj svaich met i 15% — paśla dasiahnieńnia svaich met Ukrainaj.
Aŭtary daśledavańnia źviartajuć uvahu na toje, što tolki nievialikaja častka moładzi (18%) padtrymlivaje Rasiju ŭ vajnie. U toj ža čas 50% apytanych Rasii nie padtrymlivajuć.
Padtrymka vajennych dziejańniaŭ Rasii va Ukrainie pa miedyjasiehmientach. Krynica: Chatham House
U toj ža čas prademakratyčnaja moładź čaściej maje praŭkrainski pohlad na vajnu. Jana čaściej aceńvaje vajennyja dziejańni Ukrainy jak paśpiachovyja i vieryć u pieramohu hetaj krainy. Hetaja častka moładzi taksama čaściej za inšych ličać, što vajna pavinna skončycca paśla vykanańnia Ukrainaj svaich met.
Čytajcie jašče:
Što biełarusy dumajuć pra raźmiaščeńnie ŭ krainie jadziernaj zbroi?
Novaje apytańnie pakazała, kolki biełarusaŭ padtrymlivaje vajnu i raźmiaščeńnie jadziernaj zbroi
Sacyjołahi dali śviežyja źviestki, kamu biełarusy daviarajuć i ci hatovyja žyć biez Rasii
