Ministr zamiežnych spraŭ Polščy Radasłaŭ Sikorski. Fota: Maxym Marusenko / NurPhoto via Getty Images
Na pasiadžeńni Rady Biaśpieki Arhanizacyi Abjadnanych Nacyj 22 lutaha pastajannamu pradstaŭniku Rasii ŭ AAN Vasilu Niabienziu adkazaŭ ministr zamiežnych spraŭ Polščy Radasłaŭ Sikorski.
«Jon [pradstaŭnik Rasii] nazyvaje ich [ukraincaŭ] nacystami. Adnak prezident Ukrainy — jaŭrej, ministr abarony — musulmanin, i ŭ ich niama palityčnych źniavolenych. Jon kaža, što Ukraina zahrazła ŭ karupcyi. Što ž, Alaksiej Navalny zadakumientavaŭ, nakolki čystaja i prazrystaja Rasija.
Jon abvinavačvaje ZŠA ŭ nieakałanijaliźmie. Adnak heta nie ZŠA, a Rasija sprabavała vykaranić ukrainskaść u XIX stahodździ, paśla toje samaje sprabavali balšaviki, i ciapier my nazirajem treciuju sprobu».
Rasija abvinavačvaje ŭsich u «rusafobii», dadaŭ Sikorski, ale strach pierad Rasijaj nie iracyjanalny.
«Rasija abvinavačvaje nas u tym, što nas «achapiła rusafobija», ale fobija — heta iracyjanalny strach. Tym časam były prezident Rasii i pucinskija prapahandysty amal štodnia pahražajuć nam jadziernym apakalipsisam…. Rasija sama pahražaje nam źniščeńniem, vy chočacie, kab my hetamu nie vieryli?» — skazaŭ Radasłaŭ Sikorski.
Ministr zamiežnych spraŭ Polščy prakamientavaŭ taksama apošnija ekskursy Pucina ŭ historyju rasijska-polskich adnosin:
«Jon dahavaryŭsia navat da taho, što Polšča napała na Rasiju padčas Druhoj suśvietnaj vajny. Što jon viarzie? Heta Saviecki Sajuz napaŭ na Polšču razam z nacysckaj Hiermanijaj 17 vieraśnia 1939 hoda. Arhanizavali navat sumiesny parad pieramohi 22 vieraśnia. Kaža, što Rasija zaŭsiody tolki supraciŭlałasia ahresii. Tady što rabili rasijskija vojski la varotaŭ Varšavy ŭ vieraśni 1920 hoda? Byli na «tapahrafičnaj ekskursii»? U realnaści na adno ŭvarvańnie ŭ Rasiju prypadaje dziesiać jaje ŭvarvańniaŭ u inšyja krainy», — hrymieŭ Sikorski.
«Jon kaža, što [va Ukrainie] idzie vierałomnaja vajna pa zakazie Zachadu. «Ja raju vam [Rasii]: nie traplajcie ŭ pastku, rasstaŭlenuju Zachadam, vyviedzicie svaje vojski za mižnarodna pryznanyja miežy», — iranizavaŭ Sikorski i praciahnuŭ:
«I narešcie jon kaža: «My sprabujem pierakanać Zachad, što Rasiju nielha pieramahčy». Rasija nie vyjhrała Krymskaj vajny, nie vyjhrała rasijska-japonskaj vajny, nie vyjhrała Pieršaj suśvietnaj vajny, nie vyjhrała bitvy za Varšavu [u čas polska-savieckaj vajny 1920 hoda]. Jana nie pieramahła ŭ Afhanistanie i nie vyjhrała chałodnaj vajny. Ale va ŭsim tym byŭ i pazityŭ: paśla kožnaj parazy [ŭ Rasii] pravodzilisia reformy».
«Takaja demahohija, — dadaŭ polski ministr, — nie hodnaja pastajannaha člena Rady Biaśpieki AAN. Ale čaho dasiahnuŭ pastajanny pradstaŭnik, dyk heta nahadaŭ nam, čamu my supraciŭlalisia savieckamu panavańniu. I čamu Ukraina supraciŭlajecca ciapier».
«Im nie ŭdałosia nas paniavolić tady, im nie ŭdasca paniavolić Ukrainu i nas ciapier».
U sacsietkach źjaviłasia niamała zachoplenych reakcyj na taki vystup ministra Sikorskaha.
Amierykanski historyk Cimaci Snajder nahadaŭ, što «viedańnie historyi dapamahaje. Heta daje pačućcie hodnaści i ŭpeŭnienaści siarod prapahandy vajny i hienacydu. Ministr zamiežnych spraŭ Polščy Sikorski demanstruje heta tut, u AAN».
Volfhanh Išynhier (Wolfgang Ischinger), były niamiecki dypłamat i były kiraŭnik Miunchienskaj kanfierencyi pa biaśpiecy, napisaŭ: «Brava, Radek. Vy apraŭdali našy čakańni».
Čytajcie jašče:
«Situacyja z represijami ŭ Biełarusi horšaja za časy vajennaha stanovišča ŭ Polščy» — Sikorski
Cichanoŭskaja ŭ Varšavie sustrełasia ź ministram Sikorskim
Kiraŭnik MZS Polščy: My pavinny adkazać Pucinu na movie, jakuju jon razumieje
