Fota: BiełTA
U siaredzinie sakavika źjaviłasia navina pra namier nadać liceju BDU imia Fieliksa Dziaržynskaha — zasnavalnika karnaj sistemy VČK-OHPU ŭ byłym SSSR. Nibyta kalektyŭny zvarot supracoŭnikaŭ liceja z takoj prośbaj pieradała rektaru BDU Andreju Karalu dyrektarka liceju Taciana Mamčyc.
Radyjo Svaboda źviarnułasia pa kamientar da byłoha dyrektara Liceja BDU Ihara Varaksy, jakija ciapier žyvie za miežami Biełarusi. Jon adkazaŭ, što mahčymaja źmiena nazvy liceja jaho nie dzivić.
«Mianie hetaja navina asabliva nie ŭzrušyła, bo ja ŭžo daŭno nie źviazvaju sučasny Licej BDU z tym Licejem BDU, u jakim ja vučyŭsia i ŭ jakim pracavaŭ. Licej, jaki ja pamiataju, i sučasny licej — heta dźvie absalutna roznyja ŭstanovy adukacyi», — skazaŭ Ihar Varaksa.
«Na ścieny možna pryčapić absalutna lubuju šyldu. Simvoliki tut nijakaj niama, akramia taho, što ciapierašniaje kiraŭnictva Liceja BDU dasyłaje paviedamleńnie ŭsim zacikaŭlenym i nieabyjakavym: «Hladzicie, my možam, i my robim usio, što tolki zachočam». Pry hetym pierapeckaŭšy brudam uvieś kalektyŭ — kažučy, što heta mienavita ad supracoŭnikaŭ Liceja BDU pachodzić hetaja kreatyŭnaja ideja. Što tyčycca nastupstvaŭ, to źmiena nazvy nie pryskoryć i nie zapavolić tyja niezvarotnyja razburalnyja pracesy, jakija iduć usiaredzinie piedahahičnaha kalektyvu», — skazaŭ Ihar Varaksa.
Jon pryvioŭ prykład kadravych prablemaŭ, jakija zaznaje ciapier Licej.
«Niedachop kvalifikavanych nastaŭnikaŭ davioŭ da taho, što Licej BDU na respublikanskaj navukova-praktyčnaj kanfierencyi sioleta ŭziaŭ mienš dypłomaŭ, čym Minski abłasny licej», — kaža Ihar Varaksa.
Z pasady dyrektara Liceja BDU Ihar Varaksa syšoŭ uletku 2021 hodu. Paśla jahonaj adstaŭki ŭstanovaj kiravała Hanna Čubarava, vypusknica BDU, pavodle adukacyi bijołah. U kastryčniku 2023 hoda Hannu Čubaravu na pasadzie dyrektara zamianiła Taćciana Mamčyc. Raniej ŚMI paviedamlali, što jana pracavała ŭ Instytucie nacyjanalnaj biaśpieki.
«Zvonku ŭsio zastajecca takim samym. Toj samy budynak i vieličeznaja kolkaść achvotnych pastupić. Na apošni Dzień adčynienych dźviarej pryjšło krychu mienš za 1000 čałaviek. Ale duchu liceja, jaki pieranosili ŭ 2001 hodzie ŭ słoiku z Majakoŭskaha, 96, na Uljanaŭskuju, 8, tam užo niama», — ličyć Ihar Varaksa.
Pavodle słoŭ Ihara Varaksy, raniej idejaŭ nadać navučalnaj ustanovie imia histaryčnaj asoby, tym bolš Dziaržynskaha, nie ŭźnikała.
«Na majoj pamiaci takoha nie było. Ale ja tolki ŭ 1993 hodzie pastupiŭ u licej. Za hety čas licej niekalki razoŭ pierajmianoŭvali. Spačatku heta była Minskaja siaredniaja śpiecyjalizavanaja škoła (MSSŠ) pry BDU, potym Licej pry BDU, potym prosta Licej BDU. Źmieny skončylisia, zdajecca, u 1996 hodzie, kali kančatkova zamacavałasia nazva «Licej BDU». Praŭda, potym jašče paru razoŭ adnaŭlali nazvu zhodna sa źmienami zakanadaŭstva. To bok da peŭnaha času heta była Vučebna-adukacyjnaja ŭstanova «Licej BDU», ale potym usie dziaržaŭnyja škoły pavinny byli mieć nazvu, jakaja pačynajecca z słovaŭ «Dziaržaŭnaja ŭstanova adukacyi», tamu i licej adpaviedna pierajmienavali i pamianiali statut», — zhadaŭ historyju raniejšych pierajmienavańniaŭ Liceja BDU Ihar Varaksa.
Čytajcie taksama:
Liceju BDU źbirajucca prysvoić imia Dziaržynskaha
Bijahrafija Dziaržynskaha bolš natchniaje na bunt, čym na «achranicielstva»
