Фота: Onliner.by
У рэдакцыю звярнулася Ганна разам з іншымі ўдзельнікамі тура. Новы год у іх прайшоў нетыпова: 31 снежня група правяла на экскурсіі.
— Мая сяброўка раней ездзіла з гэтай кампаніяй, і на працы я чула пра яе добрыя водгукі. Таму з тураператарам у паездку вызначыліся хутка.
Каштавала паездка 140 даляраў у эквіваленце і 100 рублёў за турыстычную паслугу.
— Да паездкі я тэлефанавала — удакладняла пра аўтобус, ці будзе ён камфортны. Мне сказалі, што так. Аднак Setra — марка аўтобуса — адназначна не падыходзіла пад паездку: ні па камфорце, ні па тэмпературным рэжыме.
Фота: Onliner.by
Я сядзела каля акна, і паездка назад была вельмі цяжкай. Ехала ў дзвюх шапках, абкручаная шалікам, у куртцы — з вокнаў дзьмула так, што я баялася прастудзіць галаву. Удакладніла ў арганізатара, ці можна нешта зрабіць. Адказ быў: аўтобус не спраўляецца з тэмпературным рэжымам.
Перасадзіць мяне ўжо не было магчымасці, бо перасадзілі іншых. Дзякуй богу, я была з цёплымі рэчамі. А калі б не, нават не ўяўляю … ляжала б цяпер з тэмпературай, як многія.
Ганна мяркуе, што аўтобус замянілі проста перад паездкай. Бо папярэдняе рассаджванне не супадала з актуальным. А месцы дзяўчына з сяброўкай для сябе спецыяльна забраніравалі загадзя.
Па словах турысткі, пасля такой паездкі 15 чалавек злеглі з тэмпературай. Гэта хоць і галоўная прэтэнзія да арганізатараў, але далёка не адзіная. Яшчэ адна праблема — халодны гатэль: «з вокнаў дзьмула проста ў твар. Ратавала толькі тое, што былі шчыльныя шторы, якія змаглі перакрыць халоднае паветра».
Не спадабалася турыстам і навагодняя праграма ў кафэ: ні абслугоўванне, ні ежа, ні забавы. Але больш за ўсё — што не спрацаваў абяцаны дэпазіт на напоі. На экскурсію ў Карэлію захацелі адправіцца не ўсе: але тым, хто вырашыў застацца, прыйшлося «змагацца» за высяленне а 12-й, а не а 8-й раніцы.
Былі прэтэнзіі і да часткі падарожжа па Карэліі: у галоўны пункт маршруту прыехалі, калі ўжо сцямнела. Ганну знервавала і месца збору групы для вяртання дадому: на ўскраіне горада, у гадзіне хады ад метро. У дзяўчыны з'явіўся велізарны пералік і больш дробных прэтэнзій. Але асноўная — холад і яго наступствы.
Надвор'е сапраўды на дні паездкі выпала марознае. Калі група вярталася ў Мінск, за акном было -30.
— Пасля паездкі нам прапанавалі запоўніць анкету зваротнай сувязі, я пакінула свой нумар для сувязі з кіраўніцтвам. Мне ператэлефанаваў кіраўнік і сказаў, што паслугі былі аказаныя ў поўным аб'ёме. Ніхто не абураўся падчас паездкі — усё ўсіх задавальняла. Трэба было суправаджальніку паведаміць — памянялі б і гатэль, і аўтобус.
Адказ турфірмы: «З якім настроем турыст сядзе ў аўтобус — з такім і з'едзе»
З кіраўніком турфірмы EuroTrip, якая арганізавала паездку, звязаліся журналісты.
— У адзін з тураў сем чалавек з 40 не прыйшлі на пасадку — захварэлі. Супрацоўнікі ў офісе хварэюць. Нейкая незразумелая эпідэмія. Падчас паездкі ў Пецярбург на вуліцы было -20. Можаце паглядзець на фота: многія хадзілі без шапак, статуі абдымалі… і выглядалі, дарэчы, вельмі шчаслівымі. Нельга ж вінаваціць турфірму ў тым, што яны захварэлі.
Я не настойваю, што з аўтобусам было ўсё ў парадку. Гэта тэхніка, правільна? Усе дэталі тэхнічнага стану трэба высвятляць у перавозчыка. Але тэмпературны рэжым, які быў па шляху ў Карэлію — мінус 30, з'яўляецца форс-мажорам, экстрэмальнымі ўмовамі надвор'я. Я ведаю, што былі турыстычныя аўтобусы, якія наогул не завяліся. Вось там турысты намерзліся. Наш перавозчык зрабіў усё, што ў яго сілах: кіроўцы не глушылі ўсю ноч аўтобус, каб усё было добра.
Нам падчас тура наогул не паступала скаргаў ні ад кіраўнікоў групы, ні ад самой групы. Хоць ва ўсіх ёсць прамы кантакт. Калі б аўтобус быў сапраўды ў такім стане, як апісваюць турысты, мы б дакладна памянялі транспартны сродак.
Мы працуем ужо дзесяць гадоў і працуем заўсёды на рэпутацыю. Тое ж тычыцца і праблем з нумарам у гатэлі.
Акрамя таго, па нашай інфармацыі, турысты грэбавалі правіламі аб распіванні спіртных напояў у дарозе. І адпаведна, гэта паўплывала на іх імунітэт і тэрмарэгуляцыю.
Кіраўнік турфірмы згаджаецца толькі з тым, што недапрацаваў чалавек, які суправаджаў. На яго думку, трэба было абмеркаваць з групай усе праблемы, звярнуць увагу на канфліктныя сітуацыі.
— Так, было холадна. Але мы не можам мяняць тэмпературу ў гарадах. У нас у тыя ж даты яшчэ два аўтобусы выязджалі: усе вярнуліся задаволеныя. З якім настроем турыст сядзе ў аўтобус — з такім і з'едзе. А там прэтэнзіі пачаліся проста з пасадкі — да ўсяго вакол.
Я не спрачаюся, што магло паддуваць камусьці. Але калі б гэта была сур'ёзная паломка, якая не давала б аўтобусу магчымасці ехаць, то мы б, вядома ж, выправілі гэта. У дадзеным канкрэтным выпадку спрацаваў нейкі эфект масы, а па факце нічога не адбылося. Усё было па дамове, па праграме, нават нідзе спазненняў не было.
Яшчэ адзін пункт, які прадстаўнік турфірмы гатовы абмеркаваць з турыстамі, — нявыкарыстаны дэпазіт. Усіх незадаволеных запрашае ў офіс па кампенсацыю 500 расейскіх рублёў (блізу 18 беларускіх рублёў).
Канфлікт па-ранейшаму не вырашаны. Ганна патрабуе вярнуць палову кошту тура, прадстаўнікі турфірмы адмаўляюць, бо ўсе паслугі былі аказаны ў поўным аб'ёме.
Каментар юрыста: «Зменшыць кошт у два разы нерэалістычна»
Дапамагла разабрацца ў пытанні юрыст Паліна Авяр'янава:
— Сітуацыя складаная, бо нікім не было зафіксавана, якая там была тэмпература. Але як гэта можна было зрабіць? Толькі калі ў кагосьці б быў з сабой градуснік. Тое ж самае тычыцца і тэмпературы ў гатэлі. Суд будзе патрабаваць доказаў. А суб'ектыўнай фразы «халодна « будзе недастаткова. Нават калі пра гэта скажуць некалькі чалавек. Усё залежыць ад таго, як да справы паставіцца суддзя. Я б узяла такіх людзей, але пры ўмове, што прадумана стратэгія даказвання.
Што тычыцца змяншэння сумы ў два разы, то гэта нерэалістычна. Можна заяўляць патрабаванне аб суразмерным памяншэнні кошту тура. Але гэта трэба абгрунтаваць — коштам папаўнення недахопаў аказанай паслугі. У выпадку з нізкай тэмпературай зрабіць гэта немагчыма. Напрыклад, быў выпадак, калі турысты прыехалі ў гатэль з аквапаркам, а той быў зачынены на рамонт. Тады мы шукалі гатэль аналагічнага ўзроўню без аквапарку і вылічвалі розніцу кошту пуцёвак. Яе і вяртала турфірма.
Адзіны момант, які я бачу: Можна спагнаць маральную шкоду за парушэнне правоў спажыўца на якасць аказанай паслугі. Але зноў жа — трэба даказаць яе няякаснасць.
Яшчэ можна запатрабаваць скасавання дамовы. Бо недахопы паслугі ўжо немагчыма ліквідаваць з-за яе характару. Але недахопы павінны быць прызнаныя істотнымі, тады можна патрабаваць і вяртання ўсіх выплачаных сродкаў, і кампенсацыі маральнай шкоды. Паўтару чарговы раз: пытанне толькі ў даказванні ў судзе.
Выснова кароткая: калі ў турыстычнай паездцы ўзнікаюць спрэчныя моманты, усё трэба фіксаваць на фота, а яшчэ лепш — на відэа.
Чытайце таксама:
Сіноптыкі паабяцалі ўзмацненне маразоў
Шкарпэткі на батарэйках і не толькі. Гаджэты, якія дапамогуць сагрэцца ў лютыя маразы
Што рабіць у выпадку пераахаладжэння? Парады ад ратавальнікаў
