Еўрасаюз хоча паскорыць уступленне ў яго краін з рэгіёну Заходніх Балкан
Кіраўнік Еўракамісіі Урсула фон дэр Ляен у сераду прадставіла ініцыятыву, закліканую паскорыць уступленне ў Еўрасаюз дзяржаў заходнебалканскага рэгіёну. Пра гэта яна абвясціла падчас выступу ў сераду на форуме Globsec у Браціславе.
31.05.2023 / 19:56
«Сёння я хачу прадставіць новую ініцыятыву, каб скарыстацца гэтым важным момантам у рэгіёне. Гэта новы план росту для Заходніх Балкан. Мы хочам развіць прагрэс, дасягнуты за апошнія месяцы. Але мы таксама хочам прынесці некаторыя перавагі сяброўства ў ЕС народам Заходніх Балкан ужо сёння», — сказала фон дэр Ляен.
План росту, які прапануе Еўракамісія, са слоў фон дэр Ляен, грунтуецца на чатырох асновах.
«Па-першае, наблізіць Заходнія Балканы да адзінага рынку ЕС. Па-другое, паглыбленне рэгіянальнай эканамічнай інтэграцыі. Па-трэцяе, паскарэнне фундаментальных рэформаў. І, па-чацвёртае, павелічэнне фондаў падрыхтоўкі да ўступлення», — заявіла еўрачыноўніца.
У пэўным сэнсе гэта новы падыход для Еўрапейскага Саюза, падкрэсліла фон дэр Ляен.
«Мы не толькі просім нашых партнёраў зрабіць новыя крокі насустрач нам. Мы таксама робім вялікі крок насустрач. Наша агульная мэта — паскорыць іх шлях у ЕС. І для гэтага мы набліжаем наш Саюз да Заходніх Балканаў», — адзначыла кіраўніца Еўракамісіі.
Гаворка ў дадзеным выпадку вядзецца пра шэсць балканскіх краін, якія дагэтуль не з'яўляюцца членамі Еўрасаюза. Маюцца на ўвазе Албанія, Боснія і Герцагавіна, Косава, Паўночная Македонія, Сербія і Чарнагорыя. Усе яны дэкларуюць сваё жаданне далучыцца да Еўрасаюза і так ці іначай, хоць і ў рознай ступені, да дасягнення гэтай мэты прасунуліся.
На дадзены момант усе гэтыя краіны, за выключэннем Косава, маюць афіцыйны статус кандыдата на ўступленне ў ЕС, Косаву ж замінае пакуль толькі ягонае асаблівае становішча, калі некаторыя краіны Еўрасаюза афіцыйна не прызнаюць ягонай незалежнасці.
Чытайце таксама:
Боснія і Герцагавіна афіцыйна атрымала статус кандыдата на ўступленне ў Еўрасаюз