Sudziać chitraha biznesmena, jaki pryhraziŭ jeŭrapiejskaj kampanii sankcyjami za adhruzku padsankcyjnamu biełaruskamu zavodu
Pra jaho zdymała ceły film «Biełaruś 1».
Juryj Alchovik. Fota ź jahonaj staronki Ukantakcie
Zatrymanaha kličuć Juryj Alchovik. Jon minčuk, jamu 36 hadoŭ. Paśla škoły skončyŭ Biełaruski dziaržaŭny technałahičny ŭniviersitet.
Doŭhi čas mužčyna pracavaŭ u firmie, jakaja zajmałasia pastaŭkami abstalavańnia dla nierazburalnaha kantrolu, chimičnaha analizu i dla vyprabavańniaŭ. Paśla syšoŭ ź jaje i adkryŭ kampaniju z takoj ža śfieraj dziejnaści.
Ź filma BT vynikaje, što asnoŭnymi klijentami firmy Alchovika byli dziaržaŭnyja kampanii, jakim treba było kantralavać jakaść mietału.
Dziela taho, kab pieramahać kankurentaŭ, jon čas ad času išoŭ na truk: pisaŭ skarhu na tendarnuju prapanovu kankurenta, u jakoj ukazvaŭ na nibyta nieadpaviednaść abstalavańnia, jakoje toj źbiraŭsia pastavić. Skarha zaciahvała zakupku, i davała jamu čas dla pošuku patrebnaha abstalavańnia pa nižejšych cenach. U niekatorych vypadkach firmu, na jakuju pryjšła skarha, uvohule vyklučali z tendaru.
Juryj Alchovik na pracy. Fota ź jahonaj staronki Ukantakcie
U filmie na BT jaho za heta achryścili «prafiesijnym skaržnikam», choć nasamreč takaja dziejnaść musiła b dapamahać — dziakujučy Alchoviku dziaržaŭnyja pradpryjemstvy nie zakuplali nieadpaviednaje abstalavańnie. U filmie mužčyna kaža, što navat kali dziaržaŭnyja kampanii zakuplali nie tyja kampanienty abo abstalavańnie, to tendar nie skasoŭvaŭsia, bo funkcyjaniery bajalisia adkaznaści za svaju niadbajnaść.
U adnym z tendaraŭ na pastaŭku padsankcyjnamu zavodu pieramahła jeŭrapiejskaja kampanija. Alchovik napisaŭ listy ŭ roznyja jeŭrapiejskija instancyi, dzie ŭkazaŭ, što firma parušaje sankcyjny režym. Pastaŭka ŭsio roŭna adbyłasia, a mužčynu zatrymali.
Sudzić Juryja Alchovika pačnuć 18 maja. Jamu pahražaje ad čatyroch da dvanaccaci hadoŭ kałonii.
«Naša Niva» — bastyjon biełaruščyny
PADTRYMAĆČytajcie taksama:
Baranavickamu ipešniku pahražaje da 12 hadoŭ turmy za «zakliki da sankcyjaŭ»
Za kamientary ŭ telehramie zatrymali žančynu ź Minska. Vyjšli na jaje vielmi prosta
