Fota: Government of Yukon
Paleantołahi znajšli hryzuna ŭ załatych kapalniach Kłandajka jašče ŭ 2018 hodzie, ale pakažuć publicy tolki ciapier.
Astanki arktyčnaha suślika buduć vystaŭlenyja ŭ Navukovym centry Yukon Beringia Interpretive Centre ŭ Uajtchorsie, jaki pavinien adkrycca paśla rekanstrukcyi hetaj viasnoj.
Suślik byŭ upieršyniu vyjaŭleny rabotnikam šachty Chiester-kryk niedaloka ad Doŭsan-Sici.
Šachciory rehularna znachodziać kości i akamianiełaści lednikovaha pieryjadu ŭ hetym rehijonie. Samyja cikavyja znachodki apošnich hadoŭ — mumifikavanaje vaŭčania i mamanciania.
Arktyčnyja suśliki (Arctic ground squirrel), jakija da hetaha času raspaŭsiudžanyja na Jukonie, robiać padziemnyja hniozdy dla zimoŭki. Hniozdy Ledavikovaha pieryjadu rehularna znachodziać zachavanymi ŭ viečnaj mierzłacie Kłandajka.
Adnak cieła hryzuna — asabliva kaštoŭnaja znachodka, kaža paleantołah Hrant Zazuła.
Suśliki — cikavy vid dla vyvučeńnia, pakolki jany vyžyli na Jukonie paśla Lednikovaha pieryjadu, u adroźnieńnie ad mamantaŭ ci mnohich inšych žyvioł.
«Žyvioły, jakija žyvuć tut siońnia, na samaj spravie davoli ciahavityja, tamu što im daviałosia pieražyć šmatlikija źmieny ŭ minułym.
Tak što heta vielmi važny ŭrok, kab padumać pra toje, jak budučyja źmieny klimatu paŭpłyvajuć na hetych žyvioł», — dadaje paleantołah.
Niekatoryja kostki mumifikavanych žyvioł z časam hublajuć kalcyj, z-za čaho renthienaŭskija zdymki atrymlivajucca mienš vyraznymi.
Z suślikam takoj prablemy nie było — renthien vyrazna pakazaŭ ćviorduju kaścianuju strukturu.
«My ŭbačyli, što jon byŭ u vydatnym stanie i prosta skruciŭsia abarankam, jak byccam spaŭ», — skazała vieterynar Džes Chit.
Renthienaŭski zdymak pakazaŭ, što heta byŭ małady suślik, jaki moh pamierci ŭ pieršy hod zimovaj śpiački. Adnak što jaho zabiła — pakul niezrazumieła.
Čytajcie taksama:
