Skrynšot videa ŭ tyktoku @Kristina_la_la_la
Dziaŭčyna, jakuju zavuć Kryścina, viadzie błoh u tyktoku i nazyvaje siabie markietołaham-avanturystam ź fiłałahičnaj adukacyjaj.
— Ja jak starannaja studentka zdała siesiju biez chvastoŭ. I dumaju: daj apłaču zahadzia. Siesija zakančvałasia ŭ lutym, i ja zapłaciła ŭ pačatku studzienia. Siadžu, čakaju nastupny siemiestr. U kancy lutaha prychodzić mnie list z univiera, što ja ŭ śpisie na adličeńnie.
Kaniečnie, heta navina vielmi ździviła dziaŭčynu i jana pačała vyśviatlać, što ž adbyłosia.
− Va ŭniviersitecie mnie kažuć: «Słuchajcie, my vielmi łajalnyja, ale, na žal, nie možam čakać apłaty tak doŭha, tamu vy ŭ zahadzie na adličeńnie».
Błohierka pačała prasić dać joj mahčymaść vyśvietlić, kudy ž źnikła apłata. Usio ž taki na konie paŭhoda jaje žyćcia: adnaŭlacca — značyć, i pisać novuju kursavuju, i atrymać šmat inšych prablem na roŭnym miescy.
U Technabanku, praź jaki Kryścina pieraličyła hrošy na rachunak VNU, paraili joj napisać zapyt i dva tydni čakać adkaz.
− Ja kažu: «Vy što, žartujecie ŭsie?» Ja jedu ŭ bank, a mnie kažuć: «My ničym nie možam dapamahčy». Ja kažu: «Dyk viarnicie hrošy». A jany mnie kažuć: «A my nie možam». Niejkuju licenziju jany nie atrymali i nie majuć dostupu da sistemy.
U kamientaryjach dziaŭčyna ŭdakładniła, što srodki paviny byli pieraličyć praz rasijskuju sistemu hrašovych pieravodaŭ CONTACT. Na sajcie Technabanka napisana: «U suviazi z adklikańniem licenzii ŭ AT «Kivi Bank» (Rasija), jaki zajaŭleny jak apieratar płaciežnaj sistemy Contact, praca nazvanaj sistemy spyniena».
Skrynšot sajtu tb.by.
U rasijskaj płaciežnaj sistemie «Kivi» ŭ kancy lutaha nasamreč zabrali licenziju. Kašalki zamarožanyja, płaciažy nie prachodziać.
Suma ŭ Kryściny prapała nie kaśmičnaja — u nastupnym videa błohierka ŭdakładniła, što havorka idzie prykładna pra 300 dołaraŭ. Ale ž praz toje, što jana nie viedała, što ŭniviersitet ich nie atrymaŭ, u dziaŭčyny pačalisia prablemy. Vučycca Kryścina dystancyjna ŭ Maskoŭskim mižnarodnym univiersitecie — da kanca vučoby joj zastałosia paŭtara hoda. Pry ŭmovie, viadoma, što atrymajecca paźbiehnuć adličeńnia. Bolš za ŭsio błohierku aburaje toj fakt, što nichto nie paviedamiŭ joj pra toje, što ŭniviersitet nie atrymaŭ jaje apłatu.
Za dva dni videa nabrała miljon prahladaŭ i amal 12 tysiač łajkaŭ.
A epapieja dziaŭčyny praciahvajecca:
− Ja tolki što čaćviorty raz vysłuchała ŭsio toje samaje: «Sistema nie pracuje, pahladzieć, kamu my pieraviali hrošy, a kamu nie, nie možam. Jurysty raźbirajucca. Napišycie znoŭ na tuju poštu, jakaja paznačana na sajcie». Lahčej ad hetaha nie stała. Adzinaje, ja apisała situacyju ŭ knizie skarhaŭ u nadziei, što mnie na jaje niechta adkaža.
Pakul što Kryścina adpraviła kvitancyju ab apłacie ŭ svoj univiersitet razam ź listom, u jakim tłumačyć situacyju. Jana čakaje, što vyrašyć kiraŭnictva VNU. Kaža, što kali jaje sapraŭdy adličać, to błohierka pojdzie pisać skarhu ŭ sud.
Čytajcie taksama:
Biełaruskuju manietu naminałam 1 rubiel pradali za 355 rubloŭ
