Alaksiej Holikaŭ
Holikaŭ — 41-hadovy błohier z Bresta, jaki prabiŭsia ŭ infaprastoru dziakujučy padtrymcy režymu Łukašenki.
Alaksiej Holikaŭ. Fota: skryn ź videa
Peŭny čas mužčyna byŭ častym hościem na dziaržaŭnym telebačańni. Paralelna Holikaŭ praciahvaŭ karjeru błohiera.
Časam razmovy zachodzili ŭ niečakany kirunak. Kali ŭ červieni 2022 hoda Holikaŭ rabiŭ intervju z hałoŭnaj redaktarkaj barysaŭskaj rajonki «Adzinstva» Kaciarynaj Varabjovaj, jany pryjšli da kramolnych vysnovaŭ i kanstatacyj pratesnaści haradoŭ, razvalenaści infrastuktury, adsutnaści hrošaj i bieśpierśpiektyŭnaści. Praz paru miesiacaŭ Vierabjova zvolniłasia.
Pa danosie Holikava naprykancy 2022 hoda kašmaryli supracoŭnikaŭ aŭtaparka ŭ Breście.
«Na kiraŭničych pasadach aŭtaparka siadziać aktyŭnyja pradstaŭniki ekstremisckaj bieł-čyrvona-biełaj ideałohii», — śćviardžaŭ błohier.
Ale praz peŭny čas na videa pačaŭ źjaŭlacca inšy mužčyna. Paźniej błohier rastłumačyŭ, što prajekt «Holikaŭ, jak jość» transfarmavany ŭ «Sidarenka ab Biełarusi», a sam Alaksiej Holikaŭ sa śniežnia 2022 hoda znachodzicca ŭ tvorčym adpačynku i na vučobie.
Fota: skrynšot kanała
Zamiest jaho kanałam staŭ kiravać kiroŭca aŭtobusnaha parka Bresta, jak sam siabie pradstaŭlaŭ novy viadučy kanała.
Pačynajučy z kastryčnika 2023 hoda, u tyktoku Holikava vostrasacyjalny kantent źmianiŭsia rekłamaj pasłuh dla lažačych pacyjentaŭ.
Profil pieratvaryŭsia ŭ kamiercyjny z ukazańniem danych IP, numaram telefona i spasyłkaj na sajt.
Fota: skrynšot
Taki samy los napatkaŭ i jutub-kanał «Kanał pra žyćcio ŭ Biełarusi. Alaksiej Holikaŭ». Na kanale zastałosia bolej za 20 tysiač padpisčykaŭ, ale ŭsie dastupnyja videa pryśviečany rekłamie pasłuh.
Cimur Prachin z vusami i biez
Cimuru Prachinu — 39, jon baćka dvuch dziaciej u razvodzie. U 2020-m jon uznačalvaŭ šeści za Łukašenku. Małady čałaviek vyłučaŭsia z natoŭpu pierš za ŭsio dziakujučy vusam.
Cimur na praŭładnym šeści ŭ 2020-m. Fota: «Naša Niva»
Prachin sprabavaŭ zajmacca muzykaj. Paśla 2020-ha jon śpiavaŭ na praŭładnych kancertach. Nazyvaje siabie vykanaŭcam «sučasnaj patryjatyčna-maralnaj pieśni».
Prachin taksama kiraŭnik respublikanskaha prajekta «U režymie praŭdy». Sutnaść prajekta ŭ tym, što prapahandysty jeździać pa roznych pradpryjemstvach i raskazvajuć pra svajo bačańnie palityki i infarmacyjnaha pola.
Imidž Prachin, darečy, źmianiŭ. Vusy zhaliŭ, zrabiŭ karotkuju stryžku i mieliravańnie.
Tak Prachin vyhladaje ciapier. Fota: «Homielskaja praŭda»
Ściuša Tajm
Choć Ściuša (sapraŭdnaje imia Nastaśsia Savickaja) pačała zajmacca błohinham jašče da 2020 hoda, zaŭvažyli jaje dziakujučy prajavam «patryjatyzmu».
Fota: skrynšot ź videa na jutub-kanale «Tieleradiokompanija Homiel»
Jak kazała sama dziaŭčyna, u žniŭni 2020-ha jana nie zmahła zmaŭčać, choć da hetaha zajmałasia zabaŭlalnym kantentam.
«U mianie maci i baćka piedahohi, byli ŭ vybarčaj kamisii. Pačaŭsia žachlivy chiejt, pahrozy. Tady skazała baćkam: «Nie chvalujciesia, ja profi, hod u internecie», — i pačała zapisvać roliki», — raspaviadała błohierka ŭ adnym ź intervju.
Dziaržprapahanda jaje zaŭvažyła. Tak sa studzienia 2021 hoda pačałasia jaje televizijnaja karjera na STB. Paralelna z pracaj na telekanale jana praciahvała aktyŭničać u sacsietak, udzielničać u praŭładnych mierapryjemstvach i aŭtaprabiehach. Nastaśsia vykładała foty z Natallaj Ejsmant i videa abdymkaŭ z Łukašenkam.
Na čaćviorty dzień paśla pačatku vajny Ściuša apublikavała videa, dzie paziruje z rasijskim ściaham pad trek Aleha Hazmanava «Vpieriod, Rośsija» (ciapier jano niedastupna).
Z časam miesca dla «patryjatyčnaha» kantentu ŭ stužkach Ściušy Tajm amal nie zastałosia. Viasnoju minułaha hoda zaviaršyłasia i televizijnaja karjera dziaŭčyny.
Nastaśsia syšła ŭ biznes. U šapcy profila ŭ instahramie jana nazyvaje siabie ekśpiertam pa prasoŭvańni biznesu i asabistaha brendu, padkreślivaje 5 hadoŭ dośviedu pracy ŭ błohaśfiery i ŚMI.
Fota: skrynšoty instahrama błohierki
Apošni raz IP Savickaja A.N pravodziła netvorkinh 17 lutaha. Cana udziełu ŭ dvuchhadzinnym anłajn-sieminary składała 40 rubloŭ. Za 55 rubloŭ udzielnika ŭ dadatak zaprašali ŭ zakryty čat u telehramie.
Antocha Krasava
Hrodzienski błohier Anton Šabašoŭ spačatku admaŭlaŭ niebiaśpiečnaść karanavirusa, a kali pačałasia elektaralnaja kampanija, pačaŭ vykazvacca ŭ padtrymku Łukašenki.
Anton Šabašoŭ u majcy z nadpisam «Hubazik. Lohki pieratrus». Fota: instahram błohiera
Dalej pa kłasicy: praŭładnyja mierapryjemstvy, aŭtaprabiehi, intervju dziaržaŭnym ŚMI.
U adnym ź ich Šabašoŭ apisvaŭ svoj šlach u zaŭziatyja prychilniki Łukašenki.
«Kali Siarhiej Cichanoŭski staŭ aktyŭna kalasić pa krainie, zdymajučy videasiužety ź vidavočna niehatyŭnym pasyłam (jak, maŭlaŭ, drenna žyviecca ludziam u hłybincy), ja zrazumieŭ, što heta samaja sapraŭdnaja infarmacyjnaja vajna suprać našaj dziaržavy. Mianie heta ščyra zakranuła, stała pa-čałaviečy kryŭdna za svaju krainu: jak tak, čamu chtości śmieje čarnić maju radzimu? I mnie zachaciełasia adkazać».
Fota: skrynšoty instahrama Šabašova
35-hadovy ŭradženiec Hrodna nastalhuje pa SSSR, aktyŭna padtrymlivaje rasijskaje ŭvarvańnie va Ukrainu.
Letam 2022 hoda jeździŭ u akupavany Łuhansk. Na fota adtul jon razam z Vadzimam Hihinym i Siarhiejem Łuščom.
Šabašoŭ padčas pajezdki ŭ Łuhansk. Fota: instahram błohiera
U adroźnieńnie ad Ściušy Tajm Anton praciahvaje aktyŭnuju błohierskuju dziejnaść praŭładnaj nakiravanaści.
«Dziaŭčyna ŭ harošak» Julija Chomič
Błohierski šlach dziaŭčyny pačaŭsia z fota ŭ instahramie, jakoje jana supravadziła chešteham #ZaBiełaruś.
«Na mianie adrazu ž pasypalisia hnieŭnyja kamientaryi. A ja nie razumieła, za što ŭvieś hety chiejt», — kazała Chomič u adnym ź intervju.
Mitynh za Łukašenku 16 žniŭnia 2020 hoda. «Za-bać-ku!» — skandziravała na im Chomič. Skryn videa «Naša Niva»
37-hadovaja Julija rodam z Tałačyna, raniej pracavała ryełtaram, a paśla syšła ŭ dekret. Žyvie z mužam u pryvatnym domie ŭ Łahojsku.
Pa słovach błohierki, abstanoŭka, jakaja skłałasia ŭ tyja dni, vielmi cisnuła na jaje. Daviedaŭšysia pra praŭładny mitynh, Chomič razam z mužam vyrašyli jechać u Minsk. Choć, jak jana sama pryznavałasia, u ich byli zaściarohi, što «sapraŭdnych patryjotaŭ» źbiarecca niašmat.
Pieršuju porcyju papularnaści jana atrymała na tym samym mitynhu, jaki ŭłady praviali 16 žniŭnia 2020 hoda. Na im dziaŭčyna emacyjna, sa ślazami na vačach raspaviadała žurnalistam pra toje, čamu padtrymlivaje režym Łukašenki.
Paśla skardziłasia, što ŭ sałonie joj admovilisia rabić manikiur praź jaje palityčnyja pohlady. Aburałasia, što «heta sapraŭdny fašyzm».
U 2021-m paśla chakiejnaha matča jana vybiehła na lod, kab pacałavać Łukašenku.
Fota: sacsietki Julii Chomič
Błohierku zaprasili pracavać na BT. Apošni vypusk prahramy ź Julijaj Chomič u roli viadučaj vyjšaŭ u sakaviku 2023 hoda. Paśla dziaŭčyna faktyčna źnikła z publičnaj prastory.
Uzimku Chomič vykłała videa ŭ tyktoku z chešteham #trojčymama, na jakim špacyruje ź dziciačym vazkom.
Apošni raz palityčny kantent u stužcy Chomič źjaŭlaŭsia letam 2023 hoda. Videa byli pryśviečanyja padtrymcy ahresii Rasii suprać Ukrainy.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Łukašenkaŭski błohier pazvaniŭ Cichanoŭskaj i zaprasiŭ na ekskursiju ŭ turmu. Taja daścipna adkazała
