Ułada Radoŭskaja, Kirył Kazakoŭ i Alena Radoŭskaja. Kałaž «Našaj Nivy»
Uładzie Radoŭskaj 22 hady. Jana ź Minska. Paśla škoły pajšła na jurydyčny fakultet BDU. Ale jurystkaj jana tak i nie stała. Ź lutaha 2021-ha, jašče da skančeńnia ŭniviersiteta, jaje ŭziali na Staličnaje telebačańnie, dy jašče i amal adrazu ŭ kadr.
Da hetaha dziaŭčynu nie zaŭvažali. Uvahu na siabie Ułada źviarnuła, kali ździekliva sprabavała ŭziać kamientar u jeŭrapiejskich dypłamataŭ, jakija pryjšli na sud nad Iharam Karniejem. I pačała zadavać im pytańni — maŭlaŭ, ci chodziać jany na niepalityčnyja sudy i «čamu ich bolš cikavić situacyja ŭnutry Biełarusi, čym va ŭłasnych krainach». Dypłamaty praihnaravali Radoŭskuju.
Ułada Radoŭskaja. Skrynšot ź videa STV
Kruty pavarot u karjery joj zabiaśpiečyli adnosiny. Praŭda, nie jaje, a maci.
Kachanka Kazakova
Maci Ułady — 45-hadovaja Alena Radoŭskaja. Rodam jana z rasijskaha Staŭrapala. Ź pieršym mužam Uładzimiram jany, chutčej za ŭsio, paznajomilisia, kali razam pracavali ŭ teleradyjokampanii «Mahiloŭ». Dalej baćka Ułady pracavaŭ apierataram i dyzajnieram u pryvatnych pradpryjemstvach. Kali jany razyšlisia, dakładna nieviadoma.
Alena Radoŭskaja na radyjo «Ziefir» (litara Z — nie simvał rasijskaj ahresii, jano tak nazyvałasia i da vajny). Fota ź jaje instahrama
Žančyna pracavała ŭ žurnalistycy amal usio žyćcio. Zhodna z bazami «Kibierpartyzanaŭ», jana pačynała ŭ «Mahilovie» ŭ nulavyja, a ŭ 2008-m zarehistravała IP, śfieraj dziejnaści jakoha paznačanaje «Vytvorčaść kina– i videafilmaŭ» i mieła ŭłasnuju fotastudyju ŭ Babrujsku. U 2018-m jaje pryznačyli prahramnym dyrektaram sajta bobrlife.by, taksama jana pracavała na babrujskim radyjo «Ziefir».
Pra pryvatnaje žyćcio Aleny da Kazakova ničoha nie viadoma. Na STB jana pryjšła ŭ sakaviku 2021-ha. Raskazvała i pra pratesty, i pra Ukrainu, ale bolš za ŭsio chvaliła Łukašenku. Voś niekalki krasamoŭnych cytataŭ ź jaje aŭtarskaj prahramy «Za spravu»:
Alena Radoŭskaja. Skrynšot STV
Pra sychod Łukašenki: «Vialikaje bačnaje na adlehłaści. Nie chočacca ŭjaŭlać, što b mahło adbycca, kali b… Ale tady vystajali. Tady čamu nas časta staŭ krytykavać prezident? Adkažycie sabie ščyra».
«Chaču skazać vialiki dziakuj uračam i siłavikam za vykanańnie słužbovaha abaviazku dla dabra ŭsich. Pieramahčy karanavirus i vytravić bčbšnuju zarazu z hramadstva my možam tolki razam».
«Vajna nie skončyłasia, nie rassłablajciesia, kaža prezident. I varta słuchać kožnaje jaho słova».
U 2021-m dziakujučy «Kibierpartyzanam» stała viadoma, što Kazakoŭ telefanavaŭ u Minskuju abłasnuju kliničnuju balnicu. Jon prasiŭ zrabić dla dvuch viadoŭcaŭ «padciažku vačej i pavieličeńnie hrudziej, ale kab bieź lišniaha šumu». Pa źviestkach z kanała «Realnaja Biełaruś», adnoj z tych, za kaho jon prasiŭ, była Alena Radoŭskaja. A zrabić apieracyju źbiralisia za dziaržaŭny košt.
Kirył Kazakoŭ i Alena Radoŭskaja. Fota ź instahrama Kiryła Kazakova
Kali Kiryła Kazakova vyhnali z STB i ŭładkavali ŭ «Minsk-Naviny», za im syšła i Alena Radoŭskaja.
Ciapier jana viadoŭca «Minsk-Navinaŭ». A kali žurnalisty sajta biaruć u jaje kamientar, to prezientujuć jak «palitołaha» abo «palitahladalnika».
A voś Ułada Radoŭskaja zastałasia na telekanale STB.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
