Ahnieška Ramašeŭskaja-Huzy. Fota: Biełsat
«Na telekanale «Biełsat» adbyvałasia iracyjanalnaje i sistematyčnaje rastračvańnie dziaržaŭnych hrošaj šlacham bieskantrolnaj zamovy pasłuh abo abstalavańnia bieź jakoj-niebudź acenki karysnaści dziejańniaŭ. «Biełsat» de-fakta funkcyjanavaŭ jak całkam niezaležnaja struktura, jakaja nie vykonvaje anijakich unutranych praviłaŭ, jakija dziejničajuć na TVP», — havorycca ŭ «słužbovaj zapiscy TVP», da jakoj nibyta atrymała dasiah polskaje vydańnie Fakt.
Kali vieryć toj zapiscy, biudžet «Biełsata» ŭ 2021-2022 hadach raptoŭna pavialičyŭsia na 50% na fonie adsutnaści anałahičnaha rostu aŭdytoryi i aktyŭnaści kanała.
U toj ža čas dachody mnohich kampanij-partnioraŭ «Biełsata» za davańnie jamu pasłuh taksama pavialičylisia na 50%, zajaŭlaje Fakt.
Akramia taho, vydańnie sa spasyłkaj na krynicy napisała pra supracoŭnika, jaki nibyta «vykarystoŭvaŭ svaju ŭłasnuju kampaniju dla akazańnia pasłuh kanału, jakija sam ža zakazvaŭ u siabie ad imia «Biełsata».
Hety supracoŭnik, pavodle Fakt, — vykanaŭčy pradziusar kanała «Biełsat» Michał Barona.
«Naš infarmatar paviedamiŭ, što Michał Barona ŭ bolšaści vypadkaŭ afarmlaŭ zakazy pasłuh ad imia «Biełsata» pad svaim podpisam na imia svajoj ža kampanii Ad Astra Media, dzie ŭ jakaści vykanaŭcy pasłuh dla kanała taksama paznačany Michał Barona.
Havorka idzie pra pasłuhi koštam niekalki sotniaŭ tysiač złotych u hod», — piša vydańnie Fakt.
U jakaści prykładu vydańnie pryvodzić infarmacyju z rachunkaŭ-faktur Ad Astra Media, jakaja akazvała pasłuhi «Biełsatu» u arhanizacyi fiestyvala biełaruskaha kino «Bulba Movie» ŭ Varšavie 31 kastryčnika 2023 hoda.
Zamova na tyja pasłuhi ad «Biełsata» była aformlena asabista Michałam Baronaj, a vykanaŭcam pasłuh ad asoby Ad Astra Media taksama vystupaŭ Barona, adznačaje Fakt.
Sam Michał Barona, jak piša Fakt, u kamientarach da vydańnia paćvierdziŭ, što jahonaja kampanija vykonvała zamovy «Biełsata», ale padkreśliŭ, što jon nie zamaŭlaŭ hetyja pasłuhi asabista.
«Heta adbyvajecca tamu (supracoŭnictva Ad Astra Media z «Biełsatam»), što maja kampanija vielmi prafiesijnaja. Ja zmoh prapanavać značna lepšuju canu za pasłuhi, čym było ŭ inšych kampanij. Dziakujučy našamu supracoŭnictvu, «Biełsat» zekanomiŭ kala 20% biudžetu na vypusk pradukcyi», — pryvodzić słovy Michała Barony vydańnie Fakt.
Nahadajem, što prablemy ŭ «Biełsata» uźnikli z pryčyny reformy hramadskich ŚMI ŭ Polščy, u tym liku telekampanii TVP, u strukturu jakoj uvachodzić «Biełsat».
Situacyja stała vynikam źmieny kiraŭnictva Polskaj televizii. Kadravyja pierastanoŭki inicyjavała novaja ŭłada, što pryjšła paśla parłamienckich vybaraŭ. Byŭ taksama zvolnieny mieniedžmient Polskaha radyjo i Polskaj ahiencyi druku.
Siarod zvolnienych akazałasia i Ahnieška Ramašeŭskaja-Huzy, jakaja 17 hod kiravała «Biełsatam» na pasadzie dyrektarki. Pry hetym joj nibyta śpiarša prapanavali zvolnicca pa ŭłasnym žadańni i «z załatym parašutam», to-bok na vielmi dobrych umovach, ale žančyna na heta nie pahadziłasia.
Kiraŭnikom «Biełsata» ciapier staŭ Alaksiej Dzikavicki.
Čytajcie taksama:
