Viadomaja brytanskaja śpiavačka RAYE vystupaje na karparatyvie ŭ ramkach štohadovaj markietynhavaj kampanii ad Spotify pad nazvaj Wrapped, 2023. Fota: Antony Jones / Stringer / Getty Images
Jak piša vydańnie Business Insider, u listapadzie 2023 hoda Spotify u ramkach svajoj štohadovaj markietynhavaj kampanii Wrapped zładziŭ dla supracoŭnikaŭ i niekatorych karystalnikaŭ raskošny karparatyŭ u Łondanie, zaprasiŭšy tudy viadomych śpievakoŭ i inšych znakamitaściaŭ.
Adnak užo praz čatyry dni kampanija skaraciła adrazu 1500 svaich supracoŭnikaŭ, zakranuŭšy navat tych, chto adkazvaŭ za arhanizacyju Wrapped i samoha karparatyvu.
«Razumieju, što dla mnohich takoje skaračeńnie budzie vielmi dziŭnym, uličvajučy niadaŭniuju spravazdaču pra vysokija dachody i dobryja pakazčyki. Ale ŭsio heta robicca dziela ekanomii i pavieličeńnia efiektyŭnaści pracy», — napisaŭ hienieralny dyrektar Spotify Denieł Ek u słužbovym liście da supracoŭnikaŭ.
Hety dovad, adnak, nie zmoh znajści razumieńnia ŭ šmatlikich zvolnienych, čym niekatoryja ź ich padzialilisia z Business Insider. Pa ich słovach, hałoŭnym faktaram niezadavolenaści ŭsio jašče zastajecca toj fakt, što, niahledziačy na masavyja skaračeńni i zakliki aščadžać, Spotify praciahvaje ładzić darahija i raskošnyja mierapryjemstvy.
«Spotify, biezumoŭna, zajmajecca zabaŭlalnym biznesam, tamu peŭnaja kolkaść ekstravahantnych mierapryjemstvaŭ źjaŭlajecca častkaj brenda. Ale vydatki na ich vielmi vialikija i nie zaŭsiody viažucca z zaklikami być ekanomnymi.
Voś, naprykład, jość tak zvanyja «ŭstupnyja dni», u ramkach jakich novych supracoŭnikaŭ z usiaho śvietu za košt kampanii adpraŭlajuć u šviedskuju štab-kvateru i raźmiaščajuć na 3-5 dzion u hateli z poŭnym charčavańniem, kab jany prosta razmaŭlali pamiž saboj, słuchali śpikieraŭ i mieniedžaraŭ, a zatym udzielničali pad kaniec u śpiecyjalnaj viečaryncy. Heta prosta durnoje marnavańnie hrošaj», — adznačajuć u kamientarach da Business Insider niekalki byłych i dziejnych supracoŭnikaŭ Spotify.
Adzin ź ich dadaŭ, što niadaŭna pracavaŭ u buchhałteryi Spotify i razam z kalehami ŭźniaŭ pierad kiraŭnictvam pytańnie ab nieabchodnaści aptymizacyi vydatkaŭ na roznyja mierapryjemstvy, «ale zaściarohi supracoŭnikaŭ byli adchilenyja».
Sam Spotify, u svaju čarhu, admoviŭsia kamientavać Business Insider situacyju sa skaračeńniami i adkazvać na pretenzii byłych i dziejnych supracoŭnikaŭ. Kampanija taksama admoviłasia raskryvać, kolki mienavita hrošaj jana vydatkoŭvaje na arhanizacyju roznych zabaŭlalnych mierapryjemstvaŭ.
Čytajcie taksama:
«Jandeks Muzyka» zabłakavała staronku šalona papularnaha biełaruskaha vykanaŭcy Ap$ent
TikTok vyznačyŭsia z nazvaj novaj sacsietki, što maje stać kankurentam instahramu
Jakija aŭdyjaknihi słuchajuć biełarusy? Najpapularnaje z Audiobooks.by
