Pres-słužba Łukašenki z zadavalnieńniem adznačyła, što «Łukašenka pieršy z zamiežnych lidaraŭ, kamu Pucin ciśnie ruku paśla pieramohi na prezidenckich vybarach», padkreślivajučy tym samym nibyta jahonuju vyklučnuju važnaść jak palityka.
Na fonie niadaŭniaha biełaruskaha kaśmičnaha dasiahnieńnia Łukašenka padziakavaŭ Pucinu za palot u kosmas Maryny Vasileŭskaj, adznačyŭšy, što biez rašeńnia rasijskaha kiraŭnika nijakaha palotu nie było b. Ale hety pośpiech tolki razahreŭ Łukašenkavy apietyty, tamu jon prapanavaŭ nieadkładna znoŭ za rasijskija hrošy padvoić kolkaść biełaruskich kasmanaŭtak:
«Kali vy padtrymajecie, to my i druhuju dziaŭčynku, jakaja była dubloram (hatovyja adpravić u kosmas). Jana padrychtavanaja, vydatkavali ž vialikija hrošy na jaje padrychtoŭku. Kali budzie žadańnie i vaša vola ŭ hetym płanie, što jana hatovaja pracavać dalej i treniravacca ŭ kasmanaŭtaŭ».
Z ekanamičnych pytańniaŭ dakładna viadoma, što Łukašenka z Pucinym razmaŭlali pra tranzit biełaruskich hruzaŭ praz rasijskija party. Łukašenka vykazaŭ zadavolenaść, što «niama takoha, što valajecca tavar na bierazie akijana ci mora i my nie možam vyvieźci», i što padtrymka Rasii tut była «vielmi važnaj i aktualnaj».
Pry hetym, u adroźnieńnie ad niadaŭniaj narady sa svaimi padnačalenymi pa prablemach raźvićcia pramysłovaści, z Pucinym Łukašenka vypramieńvaŭ aptymizm i raskazvaŭ pra hrandyjoznyja pośpiechi:
«Tyja kredyty, jakija byli vydzielenyja pad sumiesnyja prajekty — 100 młrd (rasijskich rubloŭ) — pa 80 ź lišnim užo prajekty pačynajuć pracavać. I zavody budujem, i hetak dalej. Pieražyvali z nahody čypaŭ, mikračypaŭ — abychodzimsia svaim, pačynajem raźvivać. Dumaju, my zaprasta vyjdziem z hetaj situacyi. Tamu, jak ja kazaŭ kaliści, čas krychu treba, i my vyrašym tyja prablemy, jakija nam treba razam z Rasijaj vyrašyć».
Pry hetym jon vykazaŭ nieviadoma na čym abapiertaje spadziavańnie, što i Ukraina ŭžo chutka zrazumieje, što jaje ščaście ŭ tym, kab udzielničać u hetych pracesach.
Ale hałoŭnaja tema, jak i zaŭsiody apošnija dva ź liškam hadoŭ — vajna va Ukrainie i toje, što ź joj tym ci inšym čynam źviazana.
Kali Pucin pacikaviŭsia, što tam robicca na miežach Biełarusi z krainami NATA, Łukašenka paskardziŭsia jamu na «niekanstruktyŭnaść» zachodnich susiedziaŭ, značna pierabolšyŭsia ŭzrovień ich «kryvažernaści» ŭ mihranckim pytańni:
«Dziasiatkami vykidvajuć trupy praź miažu. Idzie niejkaja kolkaść pracoŭnych mihrantaŭ — jany ich vykidvajuć. Płot pabudavali — za płot vykidvajuć da nas na miažu. Ciapier śnieh rastaŭ — ahalilisia trupy, valajucca prosta na miažy».
Akramia taho, niezadavolenaść i tryvohu Łukašenki vyklikajuć usio bolšaje zakryćcio zachodnimi krainami miežaŭ, «ad čaho ciarpiać i trecija krainy» i praviadzieńnie na ich terytoryi vajskovych vučeńniaŭ. Što, maŭlaŭ, dziŭna, bo «my nie źbirajemsia nidzie vajavać».
Pry hetym Łukašenka «absalutna padtrymlivaje mirny praces, ad jakoha nikoli Rasija nie admaŭlałasia, i siońnia ŭ tym liku». I vykazaŭ žadańnie taksama, kali što, prystroicca da hetaj spravy ŭ roli rasijskaha padhałoska:
«Kali my niejkuju rolu ŭ hetym možam adyhrać, vy viedajecie našy mahčymaści. My zaŭsiody budziem pobač i budziem dziejničać u adnym klučy z vami».
Łukašenka, viadoma, ličyć, što biez udziełu Rasii ŭ pieramovach pa Ukrainie nijakaha mirnaha pracesu być nie moža:
«Kali jany chočuć u Šviejcaryi (jany ž heta nazyvajuć «mirnaj kanfierencyjaj») biez nas havaryć pra mir va Ukrainie, boh ź imi. Naša pazicyja palahaje ŭ tym, što jany mohuć tam damovicca tolki jak uzmacnić eskałacyju hetaha kanfliktu. Biez Rasii jaki moža być mirny tam praces? Nie moža być mirnaha pracesu».
Pucin, naturalna, trymajecca toj ža dumki, skazaŭšy, što Ukraina «ŭ viadomaj stupieni zahnała siabie ŭ kut, kali admoviłasia ad pieramovaŭ u raźliku pieramahčy Rasiju na poli boju, nanieści joj stratehičnuju parazu».
Čytajcie taksama:
Łukašenka prysvoiŭ Vasileŭskaj zvańnie Hieroja Biełarusi i razdaŭ inšyja ŭznaharody
Cichanoŭskaja: Režym Łukašenki — kresła na troch nožkach: hrošy, represii i Rasija
oj, kak žie nakłoniajetsia nienakłoniajemyj