Sučasny rytm žyćcia prymušaje nas usio rabić chutka — chadzić, dumać, jeści… Ale, na žal, zvykłyja hamburhiery, buterbrody, johurty i tvaražki — skaromnaje. Tłustyja pradukty adnaznačna pavyšajuć ryzyku chvarobaŭ — pryčym nie tolki sardečnych, ale i stravavalnaha šlachu, rakavych, mužčynskich. Darečy, ciapier post. A što ŭ post pasuje?
Chlabcy
Chlabcy — heta sučasny pradukt zdarovaha charčavańnia. Jany ŭtrymlivajuć vialikuju kolkaść klatčatki i majuć vysokuju pažyŭnuju kaštoŭnaść. Zvyčajna jany robiacca tolki z celnaha zbožža roznych vidaŭ złakavych. U ich mohuć być roznyja dadatki, naprykład, vitaminy i vostryja prypravy. Technałohija vytvorčaści chlabcoŭ dazvalaje zachavać vitaminy i minieralnyja rečyvy, jakija jość u złakavych kulturach.
Abarankavyja vyraby
Abarankavyja vyraby — heta tradycyjnyja chlebabułačnyja vyraby da harbaty. Jany mohuć być u formie kołca abo avała roznaj vieličyni i ćviordaści. Da ich adnosiacca abaranki, suški, a taksama sałomka i chlebnyja pałački.
Sadavina, harodnina, arechi, siemki i suchafrukty
Jabłyki, hrušy, banany i cytrusavyja, morkva, kapusta, pamidory i ahurki, finiki, razynki, kuraha i čarnaśliŭ, arachis, funduk, kešju i mindal — usiaho nie pieraličyć. Vybirajcie toje, što bolš daspadoby.
Piečyva
Isnuje mnostva receptaŭ pryhatavańnia piečyva. Vybirajcie toje, u skład jakoha nie ŭvachodziać pradukty žyviolnaha pachodžańnia, naprykład, jajki i masła.
Batončyki miuśli
Takija batončyki vyrablajucca na asnovie aŭsianych, sojevych i pšaničnych šmatkoŭ, ekstrudyjavanaj kukuruzy i rysu, amarantu, sušanaj sadaviny, tłušču raślinnaha pachodžańnia i lecytynu. U batončykach niama cukrozy i chimičnych kansiervantaŭ.
Pirahi
Posnyja pirahi taksama možna vykarystoŭvać dla pierakusu. Ale hatavać ich daviadziecca zahadzia. Receptaŭ posnaha ciesta isnuje šmat, i ich lohka možna znajści na prastorach internetu. Dla načynki vykarystoŭvajcie hryby, sadavinu, jahady, arechi, krupy i harodninu.
Horki šakaład
Chacia horki šakaład pavodle składu źjaŭlajecca posnym praduktam, na dumku duchavienstva, sapraŭdy posnym desiertam jaho nazvać nielha. Ale ŭsio‑taki pa‑za domam, kali znajści niešta posnaje ciažka, kavałačak horkaha šakaładu nie paškodzić.
