Мінабароны патлумачыла змены заканадаўства наконт SMS-позваў
Кожнаму ваеннаму камісарыяту будзе прысвоена альфа-імя.
Ілюстрацыйнае фота «Наша Ніва»
У Міністэрстве абароны растлумачылі змены заканадаўства, якія датычацца SMS-апавяшчэння грамадзян для яўкі ў ваенкамат.
Цяпер грамадзяне могуць атрымліваць апавяшчэнне аб тым, што ім неабходна з'явіцца ў ваенкамат, праз сэрвіс кароткіх паведамленняў.
Фота: Мінабароны
SMS-паведамленні стануць дадатковым каналам апавяшчэння. Позва па-ранейшаму застанецца асноўным.
Зараз аператарам сувязі кожнаму ваеннаму камісарыяту будзе прысвоена так званае альфа-імя. Яно будзе значыцца ў графе адпраўшчыка. Са спісам альфа-імёнаў, прысвоеных ваенкаматам, можна азнаёміцца на афіцыйным сайце Мінабароны.
Альфа-імёны ваенкаматаў на прыкладзе Мінска. Фота: Mil.by
Паведамленне ад ваеннага камісарыята будзе змяшчаць наступную інфармацыю: час і дата яўкі, яе мэта, адрас па якім трэба з'явіцца, а таксама тэлефон для даведак.
Паведамленне не змяшчае спасылак і не патрабуе адказу. Асабістыя або пашпартныя даныя па тэлефоне ваенкамат ніколі не запытвае, падкрэсліла прадстаўнічка Мінабароны Наталля Гаўрусік.
